La primavera 2017 havein nus fundau la scola da sault „Spescha Dance“. Nossa finamira ei da porscher cuors da moviment e sault ella regiun Surselva per affons e giuvenils. Duront ils cuors vegnan divers stils da sault elavurai tier differents stils da musica. Ultra dallas coreografias vegnan era tecnicas da saltar e semuentar ord differentas spartas musicalas emprendidas. Alla fin dils cuors suonda ina producziun communabla, nua che mintga gruppa ha la pusseivladad da sepresentar cun las coreografias.
El mument dumbra nossa scola da sault rodund 50 saltunzas ord Lumnezia, Glion e contuorn. Communablamein vegn saltau, ris e gudiu il plascher da semuentar en gruppa.

Gia da mattatschas havein nus scuvretg nies grond interess e plascher per il saltar. Ord quei motiv havein nus gia baul entschiet cun lecziuns da ballet. El medem temps separticipavan nus a lecziuns da Hip Hop cun gia enqual producziun. Entgins onns pli tard soundan lecziuns da Jazz e Show Dance tier Christina Köb. Duront il temps che nus havevan sezzas aunc instrucziun da sault havein nus en la vegliadetgna da sedisch onns gia surpiu gruppas da sault en las vegliadetgnas da scoletta entochen giuvenils dalla superiura. Noss’intenziun ei d‘instruir vinavon nossa savida ed experientschas da sault che nus havein rimnau.
Igl onn 2017 havein nus absolviu cun success la scolaziun sco pedagogas diplomadas da sault a Zug.

Gionina

• scolasta primara
• pedagoga diplomada da sault tier Matchless Dance GmbH, Zug

Marianna

• emploiada ella canzlia tier la dertgira regiunala Plessur, Cuera
• pedagoga diplomada da sault tier Matchless Dance GmbH, Zug
• formaziun da Yoga tier Yoga Pyramide, Cuera

Fabiola

• emploiada dil fatg HR ella PDGR a Cuera
• pedagoga diplomada da sault tier Matchless Dance GmbH, Zug